پاچای لکی/ خوینت ارا گری خاسه

پاچای لکی/ "خوینت أرا گری خاسه"

ئه سالل فره دویر ئه دوره راسان، پیایی بی گه ئه گنی َ روژگار و رنج بیوری ووژ هر منالونی و هناسی سرد بیتی.

 ئو کوفَ سرده مکیشیای.
روژی ئه روژل نون و توشهِ ئو قی و قه تار بستی ئو  کته ری تا بچو أرا لا فریشته خیر.

شاواره  زوی کت ئه  ری و چی و چی . ئه نوم ری پت بیتیه گرگه کا، گرگ سر ری ارن گرت و پرسیته: کابرا یه خیره؟ وری کوئه مچی؟
پیا وت: مچم أرا لا فریشته خیر تا بزانم أرا هر هناسیم سرد ئو نکم نا اُمید و رنجم بیورهَ؟
گرگ وت: ای سه منیش ئرزی دیرم، هر وخت رسینه خزمت فریشته خیر ئرز منیش برسن تیه بی. بوش مه سالی یه گل گرَ موئم، درمون ئه درد گری منه چیه؟
 پیا وت: وه نوم چئملم موشمیه بی.

ئه دواره  کتیه ری و چی تا رسی و پت بیتیه پت أرواوی کا (کشاورز) ، أرواو پرسیتی: کابرا یه خیره وری کوئه مچی؟
پیا ریویار وت: مچم ارا لا فریشته خیر تا بزانم أرا هر هناسیم سرد ئو نکم نا اُمید و رنجم بیورهَ؟
أرواو وت: کا برا منیش ئرزی دیرم، اگر دیت وه بی بوشتی هر چی زحمته مکیشم ئه چپاله اژ زمینم خله (غله) خو سوز نمهی، میم بزونم أرا خله ام بیوره (بی نتیجه)؟
پیا وت: وه نوم چئملم موشمیه بی.

هم کته ری و چی و چی تا رسی وه شهره کلنگه ئو بی وه میمو (مهمان) حاکم شهر.
شو دوما شوم ئو دم تقه کردن، حاکم پرسیتی پیا خاس خیره؟ ئه کو هتینه؟ وری کوئه مچی؟
پیا وت: مچم أرا لا فریشته خیر تا بزانم ارا هر هناسه ام سرد ئو نکم نا اُمید و رنجم بیورهَ؟

حاکمیش وتی: ای سه منیش ئرزی دیرم، اگر دیت وه بی بوشتی، بوش شووئل (شب ها) قی و قه تار موئنم و ساز و برگ لشکر آماده مهم أرا مرافه. تا روژا ماو بتالا موئم و نمتونم بچمه مرافه؟
پیا وت: وه نوم چئملم موشمیه بی.

پیا هم کته ری و چی و چی… تا آخر سر رسی ئه لا فریشته خیر. دوما حاوالپرسی  ، ئرز ووژ  ئه ویر چتی ئو ئرز گرگ و أرواو ئو حاکم وه فریشته رسونی!

فریشته هته جواو و وت: حاکم شهر أرا یه نمتونی بچو وه مرافه أگرد  دشمن و بتالا ماو  چوین پیا نیه ئو ژنئکه، ژنیش دلرحمن و خوشو نمای خوئنه کسی برشنن.
چپالی أژ زمینه أرواو گه خله سوز نمهی، گنجی ئه یاقوت و زمرووت (زمرد) هاتیه ژیره ره گه باید ایر آرتی  تا هم بوئه سای گنج و هم خله خو سوز بهه زمینه.
درمون درد گرگ گریج، میژین (مکیدن) خوئن بنی آئم ساعقلَ (آدم دیوانه)، چوین خوئن پیا نه زون (نادان) ئو ساعقل  ارا گری خاسه.
پیا ریوار پزگه إیر کیشته ئو کپنک کردیه کول و کلاش إیر کیشای و ویر ئه ولات ووژ کتیه ری.
هت أرا شهر کلنگه ئو چی وه خزمته حاکم. حاکم هته ور پیا ئو جواوه فریشته پرسیتی . پیایش حال و ماجرا أران وتی.
حاکم وت: ئیسگه گه فریشته خیر فرمایشت کردیه گه مه ژنم بوره مردی  بکه مه باواز و تو بو وه حاکم ئه ولات کلنگه.
پیا ئه جواو وتی: مه نمتونیم أر إیره بوسم چوین کاری دیرم.

 کتی ری و ئو چی، رسی ئه لا پیا أرواو ئو جواو فریشته خیر رسونه بی.
أرواویش وت: ئیسگه گه هونسه بوس تا وه گرده یک گنجه إیراریم و بشت (سهم ات) بم.
پیا ئه جواو وتی: نمتونم أر إیره بوسم چوین کاری دیرم . هم کتی ری ئو چی.
هت و هت تا رسی ئه لا گرگ گر و جواو فریشته رسونه بی.
گرگ سر برده سیفا ئو وتیه پیا: فریشته خیر چه جواوه وه ووژت دای؟

پیا هناسی سردی کیشای ئو وت: ئی داد بی داد ئه کل ریه چم تا لا فریشته خیر ئو ئه ویرم چی  پرسیار (سوال) ووژم بپرسم ئو درمون درد ووژم بهم، ئه نهات و ئه آخر شریه ووژم .

گرگ وت: ئیسگه ووژت بوش! نه زون تر و ساعقل تر ئه تو کی هس؟
اسگه ئه جا پری ئو مل پیا سا عقل اشکونی ئو تا آخر خوئن میژیتی

نویسنده: محمد حسنی نیا